Երևանի ավտոբուսում կնոջ նկատմամբ բռնություն գործադրելու և հասարակական կարգը խախտելու մեջ մեղադրվող տղամարդը չի կալանավորվի։ Նրա նկատմամբ այլ խափանման միջոցներ են ընտրվել։ Այդ մասին հայտնել են ՀՀ քննչական կոմիտեից, տեղեկացնում է Sputnik Արմենիան:
Քննչական կոմիտեից հայտնել են, որ նախաձեռնված քրեական վարույթի շրջանակում երկու անձի նկատմամբ հանրային քրեական հետապնդում է հարուցվել։
Նրանցից մեկի՝ միջադեպը տեսանկարահանած կնոջ (խմբ.) նկատմամբ քրեական հետապնդում է հարուցվել ՀՀ քրեական օրենսգրքի 297-րդ հոդվածի 1-ին մասով, որը վերաբերում է խուլիգանությանը։ Նրա նկատմամբ որպես խափանման միջոց ընտրվել է բացակայելու արգելքը։
Երկրորդ անձի՝ ենթադրաբար սեփական կնոջը վիրավորած տղամարդու (խմբ.) նկատմամբ քրեական հետապնդում է հարուցվել ՀՀ քրեական օրենսգրքի 196-րդ հոդվածի 2-րդ մասի 8-րդ կետով։ Նշված դրույթը վերաբերում է զուգընկերոջ կամ նախկին զուգընկերոջ կողմից ֆիզիկական ուժեղ ցավ կամ հոգեկան ուժեղ տառապանք պատճառելուն։ Տղամարդու նկատմամբ որպես խափանման միջոցներ կիրառվել են վարչական հսկողությունը և բացակայելու արգելքը։
Դեպքի հանգամանքների ամբողջական պարզաբանմանն ուղղված նախաքննությունը շարունակվում է։
