Երևանի Կենտրոն և Արաբկիր վարչական շրջաններում փոշու պարունակությունը գերազանցել է սահմանված թույլատրելի նորմերը։ Հիդրոօդերևութաբանության և մոնիթորինգի կենտրոնը հրապարակել է մայրաքաղաքի մթնոլորտային օդի որակի վերաբերյալ հոկտեմբերի 14-20-ի դիտարկումների արդյունքները։
Մասնավորապես, Կենտրոն վարչական շրջանում փոշու թույլատրելի մակարդակի գերազանցում է գրանցվել հոկտեմբերի 15-19-ը, իսկ Արաբկիրում՝ հոկտեմբերի 20-ին։
Միևնույն ժամանակ, Շենգավիթ և Նոր Նորք վարչական շրջաններում դիտարկված ժամանակահատվածում փոշու պարունակությունը չի գերազանցել սահմանային թույլատրելի կոնցենտրացիան։
Մոնիթորինգի արդյունքներով՝ ազոտի երկօքսիդի պարունակության թույլատրելի շեմի գերազանցում նույնպես արձանագրվել է։ Մասնավորապես, Կենտրոն վարչական շրջանում հոկտեմբերի 14-ին գրանցվել է սահմանված նորմայից բարձր ցուցանիշ։
Արաբկիրում, Շենգավիթում և Նոր Նորքում ազոտի երկօքսիդի պարունակությունը մնացել է թույլատրելի սահմաններում։
Ինչ վերաբերում է ծծմբի երկօքսիդին, ապա դիտարկումների ամբողջ ժամանակահատվածում դրա պարունակության սահմանային թույլատրելի կոնցենտրացիայի գերազանցումներ չեն արձանագրվել։
