Վրաստանի ընդդիմությունը հայտարարել է բողոքի ցույցերի նոր ալիքի մեկնարկի մասին

Հոկտեմբերի 25-ին Թբիլիսիում ընդդիմադիր քաղաքական ուժերի և քաղաքացիական հասարակության ներկայացուցիչների նախաձեռնությամբ անցկացվել է բողոքի երթ՝ «Վրաստանն առանց Իվանիշվիլիի» կարգախոսով։ Ակցիան կազմակերպվել է այն ժամանակ, երբ երկրի Սահմանադրական դատարանը քննում է ընդդիմադիր կուսակցությունների գործունեությունն արգելելու վերաբերյալ հայցը։

«Կոալիցիա հանուն փոփոխությունների» ընդդիմադիր միավորման առաջնորդ Նիկա Գվարամիան հանրահավաքի մեկնարկից առաջ հայտարարել է, որ այս հավաքով սկիզբ է դրվում բողոքի շարժման նոր ալիքին, գրում է Deutsche Welle-ն:

Ցուցարարները Թբիլիսիի պետական համալսարանի տարածքից շարժվել են դեպի Ռուսթավելիի պողոտա, մասնակցել են հազարավոր քաղաքացիներ, որոնք կրել են Վրաստանի, Ուկրաինայի և Եվրամիության դրոշները։ Հավաքի վայրում մեծ թվով իրավապահներ են տեղակայված եղել։

Գվարամիայի խոսքով՝ ընդդիմադիր շարժումը պետք է հասնի իր վճռորոշ փուլին՝ անկախ նրանից՝ դա տեղի կունենա նոյեմբերի 28-ին, երբ լրանում է Վրաստանում զանգվածային բողոքի ցույցերի մեկնարկի երկրորդ տարին, թե դրան հաջորդող օրերին։ Գվարամիան կարևորել է հատկապես նոյեմբերի 28-ին քաղաքացիների զանգվածային մասնակցությունը՝ ընդգծելով, որ բողոքի շարժումը պետք է բավականաչափ հզոր լինի, որպեսզի հնարավոր չլինի այն մարել։

Երթին մասնակցել է նաև «Եվրոպական Վրաստան» կուսակցության առաջնորդ Գիգի Ծերեթելին, որը, ըստ «Վրաստան Online» լրատվամիջոցի, տեղեկացրել է նոյեմբերի 28-ին նախատեսվող լայնածավալ և կարևոր բողոքի ակցիայի մասին։

Ծերեթելին մտահոգություն է հայտնել երկրում ժողովրդավարական գործընթացների վիճակի առնչությամբ։ Նրա գնահատմամբ՝ Վրաստանում ժողովրդավարական համակարգի թուլացումն ու քաղաքական դաշտում տեղի ունեցող զարգացումները չափազանց մտահոգիչ են, հատկապես այն հանգամանքը հաշվի առնելով, որ երկիրը նախկինում համարվել է եվրոպական ինտեգրման գործընթացի առաջատարներից մեկը, մինչդեռ այժմ հայտնվել է հետնապահների շարքում։

Ընդդիմադիր գործիչը նաև քննադատել է քաղաքական կուսակցությունների գործունեությունն արգելելու նախաձեռնությունները՝ դրանք դիտարկելով որպես քաղաքական կյանքի սահմանափակում։ Նա ուշադրություն է հրավիրել նաև երկրում քաղաքական բանտարկյալների խնդրի վրա՝ այն համարելով Վրաստանի առջև ծառացած լուրջ մարտահրավերներից մեկը։

Վրաստանում զանգվածային հակակառավարական բողոքի շարժումը սկիզբ է առել 2024 թվականի գարնանը՝ այսպես կոչված «օտարերկրյա գործակալների» մասին օրենքի ընդունման շուրջ առաջացած դժգոհությունների հետևանքով։