TRIPP նախագծի իրականացման համար անհրաժեշտ փաստաթղթերի համաձայնեցման աշխատանքները դեռ ամբողջությամբ չեն ավարտվել՝ մեկ-երկու փաստաթուղթ շարունակում է մնալ համաձայնեցման և ընդունման փուլում, սակայն ակնկալվում է, որ այդ գործընթացը կեզրափակվի շատ մոտ ապագայում։ Այդ մասին հայտարարել է Հայաստանի արտաքին գործերի նախարար Արարատ Միրզոյանն ԱԺ-ում՝ ներկայացնելով նախագծի իրականացմանն առնչվող ռազմավարական համագործակցության շրջանակային համաձայնագրի վավերացման մանրամասները։
Նախարարը պարզաբանել է, որ խոսքը մասնավորապես բաժնետերերի միջև կնքվելիք համաձայնագրի և TRIPP զարգացման ընկերության կանոնադրության մասին է, հայտնում է 1lurer.am-ը:
«Դա բաժնետերերի միջև համաձայնությունն է և TRIPP զարգացման ընկերություն կոչվող ընկերության կանոնադրությունը։ Ուզում եմ նշել, որ TRIPP զարգացման ընկերությունը կհիմնադրվի ՀՀ կառավարության և «ԹՐԻՓՓ զարգացման ընկերություն ԱՄՆ» ընկերության կողմից։
Հաշվի առնելով զանազան հնարավոր սցենարներ և մտահոգություններ, ասեմ, որ «ԹՐԻՓՓ զարգացման ընկերություն ԱՄՆ»-ը մշտապես գտնվելու է միմիայն ԱՄՆ կառավարության կառավարման և սեփականության իրավունքի ներքո»,- ասել է Արարատ Միրզոյանը։
Նրա խոսքով՝ TRIPP զարգացման ընկերության մեջ ՀՀ-ն կունենա 26 տոկոս բաժնեմաս, իսկ ԱՄՆ-ը՝ ի դեմս «ԹՐԻՓՓ զարգացման ընկերություն ԱՄՆ»-ի, 74 տոկոս բաժնեմաս։
«Այս հարաբերակցությունը կգործի 49 տարով, որով կտրվեն այդ ենթակառուցվածքները կառուցելու և շահագործելու իրավունքները, այնուհետև ժամկետի լրացումից հետո կողմերը հնարավորություն կունենան երկարացնելու համագործակցության ժամկետը ևս 50 տարով։ Եվ ահա այդ դեպքում ՀՀ բաժնեմասերը ավտոմատ կերպով, առանց որևէ հավելյալ ներդրման, կդառնան 49 տոկոս, և «ԹՐԻՓՓ զարգացման ընկերություն ԱՄՆ»-ին կմնա 51 տոկոսը»,- ասել է ԱԳՄԱ նախարարը։
