ՀՀ զինված ուժերը պետք է գտնվեն քաղաքացիական վերահսկողության ներքո, հայտարարել է վարչապետ Նիկոլ Փաշինյանն ԱԺ–ում կառավարության հետ հարցուպատասխանի ժամանակ: Նա այդպես է արձագանքել ՔՊ–ական պատգամավոր Սարիկ Մինասյանի հարցին, որն առաջարկել է վարչական կամ քրեական պատասխանատվություն սահմանել բանակի վրա «հարձակումների» համար։
ՔՊ–ական պատգամավորի մոտ այս մտահղացումն առաջացել էր ընդդիմադիր պատգամավորների քննադատական հայտարարություններից հետո, որոնք ուղղված էին բանակին և սահմանապահ ծառայությանը` ադրբեջանցի զինվորի կողմից ՀՀ սահմանն ապօրինի հատելու և Շաքի գյուղ ներթափանցելու համատեքստում, հայտնում է Sputnik Արմենիան:
«Պետք է արձանագրել, որ կարևոր է, որպեսզի ԶՈւ–ն լինի քաղաքացիական վերահսկողության ներքո։ Մեր երկրում դա եղել է, որ բանակի մասին եկեք չխոսենք, բանակի մասին չի կարելի խոսել, բայց վերջում տեսել ենք` ինչի է դա հանգեցրել։ Ձևավորել ենք մի ծխածածկույթ, բայց դրա տակ բոլորովին այլ բան է եղել»,– ասել է Փաշինյանը։
Նա ընդգծել է, որ առհասարակ պետք է խուսափել այնպիսի վերաբերմունքից, ըստ որի՝ բանակի մասին ընդհանրապես ոչինչ չի կարելի ասել։
