Մարտի 23-ին Համայն Վրաց Պատրիարք Իլյա Երկրորդը Վրաստանում դիվանագիտական առաքելության ավարտի կապակցությամբ ընդունել է Վրաստանում դիվանագիտական առաքելությունն ավարտող Հայաստանի դեսպան Հրաչ Սիլվանյանին:
Վրաց ուղղափառ եկեղեցու հովվապետը, կարևորելով երկու քրիստոնեական ժողովուրդների բարեկամությունը, բարձր է գնահատել Հրաչ Սիլվանյանի առաքելությունը Վրաստանում և նրա ներդրումն այդ բարեկամության ամրապնդման գործում:
Զրույցի ընթացքում անդրադարձ է կատարվել նաև վիրահայության եկեղեցական կյանքին առնչվող հարցերին և Ամենայն Հայոց Կաթողիկոս Գարեգին 2-րդի` այս տարվա հունիսին Վրաստան նախատեսվող այցին:
Հանդիպմանը մասնակցել են նաև Վիրահայոց թեմի առաջնորդ Վազգեն եպիսկոպոս Միրզախանյանը և Վրաց եկեղեցու բարձրաստիճան հոգևորականներ, հաղորդում է ՀՀ ԱԳՆ մամուլի, տեղեկատվության և հասարակայնության հետ կապերի վարչությունը:
