ԱՄՆ նախագահ Բարաք Օբաման գաղտնի կարգադրություն է ստորագրել Լիբիայում ԱՄՆ բանակի գաղտնի գործողություն սկսելու վերաբերյալ: Գործողությունն ուղղված է ապստամբների աջակցությանը Մուամար Քադաֆիի հետ պայքարում: Այդ մասին հայտնում է ABC News-ը, հղում անելով սեփական աղբյուրներին: Կարգադրության մեջ կան կետեր, որոնք թույլ են տալիս անկանխատեսելի հանգամանքների դեպքում մատակարարել Քադաֆիի հակառակորդներին զենքով, սակայն հրահանգ չի պարունակում գործողության այս փուլում զենքն ապստամբներին հանձնելու վերաբերյալ:
Սպիտակ տան ներկայացուցիչները հրաժարվել են մեկնաբանել այս տեղեկությունները՝ հղում անելով տվյալների գաղտնի բնույթին: «Ապստամբներին զենքով մատակարարելու մասին որոշում չի ընդունվել: Մենք չենք բացառում, սակայն, չենք էլ հաստատում այդ հնարավորությունը: Մենք գնահատում ենք և դիտարկում ենք Լիբիայի ժողովրդին աջակցելու բոլոր տարբերակները»,-ասվում է Օբամայի ներկայացուցիչների հայտարարության մեջ:
Մինչդեռ, հայտնի է դարձել, որ սենատոր-հանրապետական Ռենդ Փոլը նախաձեռնել է ԱՄՆ Սահմանադրությանը Լիբիայում ռազմական գործողության համապատասխանության քննարկում: Բանավեճի արդյունքում Սենատը կարող է փաստաթուղթ ընդունել նախագահի կողմից իր լիազորությունների չարաշահման մասին:
