«Ազգ»-ի տվյալներով, ապրիլի 19-ին Վաշինգտոնում, PKK-ի կողմնակիցները, իսկ ապրիլի 24-ին հայերը պատրաստվում են բողոքի ցույց կազմակերպել Թուրքիայի դեսպանատան առջեւ:
«PKK-ի կողմնակիցները ասելով պետք է հասկանալ քրդերին, որոնք, ըստ երեւույթին, դատապարտում են 1937-38 թթ. Դերսիմում թուրքական զինված ուժերի իրագործած ջարդերը, որոնք ցեղասպանության բնույթ են կրում:
Ամերիկահայերի ցույցին թուրքական կողմը կպատասխանի դեսպանատան մայթին նախատեսվող եռօրյա նստացույցով, որպեսզի մայթը չզիջի հայ ցուցարարներին: Ըստ թուրքական կայքէջի, ԱՄՆ-ի թուրքական եւ ադրբեջանական կազմակերպությունները հաղորդագրություններով, ինչպես նաեւ հնարավոր այլ միջոցներով նստացույցի են հրավիրել ամերիկաբնակ թուրքերին եւ ադրբեջանցիներին:
Նստացույցի կազմակերպման նախաձեռնությունն ստանձնել է Ամերիկայի թուրքական միությունների խորհուրդը, որի հաղորդագրության մեջ ասված է. «Ամեն տարի ապրիլի 24-ին Վաշինգտոնում հայերը Թուրքիայի դեսպանատան առջեւ այսպես կոչված Հայոց ցեղասպանության զոհերի հիշատակին ցույց են կազմակերպում: Մենք էլ, ինչպես ամեն տարի ենք անում, այս տարի եւս կհավաքվենք դեսպանատան առջեւ եւ ցեղասպանության անհիմն պնդումների համար կդատապարտենք հայերին»: Ի դեպ, թուրք-ադրբեջանական եռօրյա նստացույցը կսկսվի ապրիլի 22-ին: Բացի նստացույցից, Ամերիկայի թուրքական միությունների խորհուրդն ապրիլի 24-ի ելույթում «ցեղասպանություն» բառը չօգտագործելու պահանջով նախագահ Օբամային դիմելու կոչ է արել Ամերիկայում բնակվող թուրքերին եւ ադրբեջանցիներին:
