Արդեն ավանդական դարձած ճանաչողական այցով Ստեփանակերտում գտնվող ՀՀ ԱԳՆ դիվանագիտական դպրոցի երեք տասնյակ սաների` դպրոցի ռեկտոր Վահե Գաբրիելյանի գլխավորությամբ, ընդունեց ԼՂՀ արտաքին գործերի նախարարի պաշտոնակատար Վասիլի Աթաջանյանը:
Արցախի արտաքին քաղաքական գերատեսչության ղեկավարի պաշտոնակատարը ապագա դիվանագետներին ծանոթացրեց ղարաբաղյան խնդրի ծագումնաբանությանը, անդրադարձավ բանակցային գործընթացի ներկա իրողություններին, հիմնախնդրի խաղաղ կարգավորման վերաբերյալ պաշտոնական Ստեփանակերտի դիրքորոշմանը, ապա պատասխանեց նրանց հետաքրքրող հարցերին:
Մինչ այդ ՀՀ ԱԳՆ դիվանագիտական դպրոցի պատվիրակությանն ընդունել էին ԼՂՀ ԱԺ նախագահ Աշոտ Ղուլյանը, ԼՂՀ վարչապետ Արա Հարությունյանը, հաղորդում է ԼՂՀ ԱԳՆ մամուլի ծառայությունը:
