Նախորդ տարվա սեպտեմբերից մինչև դեկտեմբերի վերջն ընկած ժամանակահատվածում հանրապետության ավելի քան 900 դպրոցներում տեղի են ունեցել տնօրենների մրցույթներ, որոնցից ընդամենը մեկ տասնյակի` այսինքն մոտ 1 տոկոսի վերաբերյալ են բողոքներ ու դժգոհություններ եղել: ՀՀ ԿԳ նախարարին կից գումարված կոլեգիայի նիստում այսօր այս մասին ասել է նախարար Արմեն Աշոտյանը՝ նշելով, ցանկացած համակարգային բարեփոխման համար սա դրական ցուցանիշ է:
«Այնուամենայնիվ որոշ դպրոցներում կա դպրոցի տնօրենի ընտրության գործընթացի հետ կապված խնդիր, որն անհրաժեշտ է կարգավորել տվյալ համայնքի բնակչության և մարզպետարանի լիազորությունների, ինչպես նաև նախարարության քաղաքականության համատեքստում»,- նշել է Ա. Աշոտյանը և հավելել, որ տեսչական ստուգումների ընթացքում հայտնաբերված խախտումներն ու թերությունները վերացնելու ուղղությամբ ավելի հետևողական աշխատանքի անհրաժեշտություն կա:
