Պաշտոնական Երեւանն ակնկալում է, որ Լեռնային Ղարաբաղի հակամարտության կարգավորման շուրջ բանակցությունները կշարունակվեն այն կետից, որում ընդհատվել են: Այդ մասին հայտարարել է Հայաստանի արտգործնախարար Վարդան Օսկանյանը «Ազատություն» ռադիոկայանին տված հարցազրույցում: Նրա խոսքերով` Հայաստանի եւ Ադրբեջանի նախագահները «հասել են լուրջ առաջընթացի եւ բավականին լավ հիմք է դրվել հետագա բանակցությունների համար»: Նախարարը նշել է, որ ԱՄՆ ղեկավարության եւ մյուս երկրների իր գործընկերների հետ հանդիպումների ընթացքում հիմնական շեշտը դրվել է «վերջին տարիների գործընթացներն ու դրանց հիման վրա ստեղծված այսօրվա իրավիճակն անտեսելու անհնարինության վրա»: Պատասխանելով Ադրբեջանի վարչապետ Իլհամ Ալիեւի Հայաստանի հասցեին Նյու Յորքում հնչած մեղադրանքների մասին հարցին` Վ. Օսկանյանը նշել է, որ «Ադրբեջանի վարչապետի բերած փաստարկներն ու վերլուծությունը նենգափոխված են»: «Մենք հասկանում ենք, որ Ի.Ալիեւը նախագահի պաշտոնի թեկնածու է եւ փորձում է դուր գալ իր ժողովրդին: Սակայն մեզ մտահոգում է այն, որ նման հայտարարություններից հետո դրանց հեղինակներն իրենք իրենց անկյում են մտցնում, որտեղից նրանց դժվար կլինի դուրս գալ ընտրություններից հետո», – հայտարարել է նա: Միեւնույն ժամանակ նախարարը չի բացառել, որ Լեռնային Ղարաբաղին առնչվող Իլհամ Ալիեւի հայտարարությունները սոսկ նախընտրական չեն, եւ նրա դիրքորոշումը այդ հարցում հնարավոր է, որ կոշտ կլինի: «Սակայն այն, ինչ նա խոստանում է, անիրատեսական է, եւ Ադրբեջանի ժողովրդին հիասթափություն է սպասում, քանի որ այսօր միջազգային գործընթացները, այդ թվում նաեւ ԵԱՀԿ Մինսկի խմբի շրջանակներում, ընթանում են միանգամայն այլ ուղիով, քան այն, որն իր ելույթում փորձել է ներկայացնել Ի. Ալիեւը», – ընդգծել է ՀՀ ԱԳՆ ղեկավարը:
Հայաստանի առաջին և ամենահին առցանց մեդիան՝ 2000 թվականից։
Ապագան պայծառ է և եռագույն™
Իմ PANը
