Հայաստանի եւ Թուրքիայի միջեւ դիվանագիտական հարաբերությունների հաստատման մասին Արձանագրություններում ամրագրված ժամանակցույցն այն մեխանիզմներից մեկն է, որն Անկարային թույլ չի տա այլ քայլի դիմել Երեւանի նկատմամբ: Այդ մասին Երեւանում կայացած մամլո ասուլիսին հայտնել է Գլոբալիզացման ու տարածաշրջանային համագործակցության վերլուծական կենտրոնի ղեկավար Ստեփան Գրիգորյանը: «Փաստաթղթերում հստակ նշված են այս կամ այն գործողության ժամկետները, եւ դա թույլ չի տա, որպեսզի Թուրքիան այլ քայլի դիմի»,- ընդգծել է հայ փորձագետը: Նրա խոսքով, այդ փաստաթղթերը կարող են իդեալական լինել, բայց ամբողջ հարցը նրանում է, թե արդյոք դրանք իդեալական կիրագործվեն, թե ոչ:
Ստեփան Գրիգորյանը նաեւ նկատել է, որ արձանագրություններում ոչինչ չի ասվում Հայաստանի եւ Թուրքիայի միջեւ պատմաբանների հանձնաժողովի ստեղծման հարցի մասին: «Արձանագրություններում խոսվում է միջկառավարական հանձնաժողովի ստեղծման մասին, որն ունենալու է իր ենթահանձնաժողովները: Փաստաթղթերում ընդամենը նշվել է Հայաստանի եւ Թուրքիայի միջեւ «պատմական հարթության» մասին, եւ հասկանալի է, որ կողմերը պետք է զանազան պատմական հարցե շոշափեն: Օրինակ, հայկական կողմը կարող է բարձրացնել Թուրքիայի տարածքում գտնվող հայկական եկեղեցիների եւ մշակութապատմական հուշարձանների դրության հարցը»,- հայտնել է Ստեփան Գրիգորյանը` ավելացնելով, որ յուրաքանչյուր փաստաթուղթ կարող է իր մեջ ռիսկ պարունակել, բայց դրանից պետք չէ վախենալ:
