Հոկտեմբերի 24-ին Հայաստանի արտաքին գործերի և միջազգային առևտրի նախարար Արարատ Միրզոյանը Եվրոպական հանձնաժողովի ընդլայնման և արևելյան հարևանության հարցերով գլխավոր տնօրեն Խերտ Յան Կոպմանի հետ հանդիպմանը քննարկել է Հայաստան-ԵՄ գործընկերության ռազմավարական օրակարգի իրականացման ուղղությամբ տարվող աշխատանքների ընթացքը։
Զրուցակիցներն անդրադարձել են Հայաստանի էներգետիկ ու տնտեսական դիմակայունության բարձրացմանն ուղղված նախաձեռնություններին՝ առանձնահատուկ ուշադրություն հատկացնելով արտաքին առևտրի դիվերսիֆիկացման գործընթացին։ Արարատ Միրզոյանն ընդգծել է հայկական արտադրանքի համար Եվրամիության առևտրային ինքնավար միջոցների վերաբերյալ կարգավորման ընդունմամբ ստեղծված հնարավորություններն ամբողջությամբ օգտագործելու կարևորությունը։
Հանդիպման մասնակիցները նաև մտքեր են փոխանակել խաղաղության հետագա ամրապնդման և դրա հետևողական ինստիտուցիոնալացման համար անհրաժեշտ հնարավոր գործողությունների վերաբերյալ։ Քննարկման առարկա են դարձել նաև Հայաստանի մասնակցությամբ, «Խաղաղության խաչմերուկ» նախաձեռնության տրամաբանությանը համապատասխան, տրանսպորտային ենթակառուցվածքների ցանցի ընդլայնմանն ուղղված ծրագրերը։
Կողմերն անդրադարձել են նաև առաջիկայում նախատեսվող բարձր մակարդակի շփումներին։
